A compravenda de vivendas en Galicia medra un 8,1% en xaneiro, ata chegar ás 2.359 operacións

A compravenda de vivendas en Galicia medrou un 8,1% en xaneiro respecto ao mesmo mes do ano pasado, ata chegar ás 2.359 operacións. Segundo publica o Instituto Nacional de Estadística (INE), este incremento é inferior ao contabilizado a nivel nacional, xa que no total de España, a compravenda de vivendas subiu ata un 11%, con 60.650 sinaturas, a maior cifra rexistrada neste mes dende 2008.

Ourense, cunha subida do 12,8% e 229 operacións, foi a provincia galega onde máis creceu esta estatística; seguida de A Coruña, cun incremento do 11,4% e 1.162 operacións e Pontevedra, cun aumento do 9,3% e 707 operacións. Pola contra, en Lugo rexistrouse unha caída do 10%, con 261 compravendas de vivendas. En total, transmitíronse en Galicia un total de 4.315 vivendas, un 2,8% máis, das cales máis dun millar foron por herdanzas.

En relación ás fincas transmitidas en Galicia, en xaneiro reduciuse un 3,3% coa cifra de 10.315. Delas, 2.344 eran fincas rústicas, un 18% menos, mentres que 7.971 eran urbanas, un 2% máis.

Máis de 60.600 operacións a nivel nacional

A nivel nacional, a compravenda de vivendas subiu en xaneiro un 11% respecto ao mesmo mes de 2024, ata un total de 60.650 operacións. Deste xeito, esta estatística encadea sete meses de subidas interanuais, aída que a de xaneiro foi máis moderada que a de decembro de 2024 (+37,7%).

Este incremento debeuse ás operacións sobre pisos novos (+30,9% interanual) que chegaron ás 14.164 operacións e ás realizadas sobre pisos usados (+6,1%), que rexistraron 46.486 sinaturas.